د کابل ښاروال سره د اتاق د مشرتابه پلاوي ناسته

د افغانستان د سوداګرۍ او پانګونې خونې مشرتابه پلاوي غړو، د تازه مېوو او سبزیو د اتحادیو مشرانو، رغنیزو شرکتونو او د خصوصي سکتور یو شمېر غړو د 1398 کال  چنګاښ پر 16مه د یکشنبې ورځ د کابل له ښاروال احمد ذکي سرفراز او مل ټیم سره د یوې ناستې پرمهال چې د اتاق د غونډو په تالار کې جوړه شوې وه کابل ښار کې د خصوصي سکتور د ستونزو او ننګونو په تړاو بحث وکړ.

په پېل کې د افغانستان د سوداګرۍ او پانګونې خونې د مدیره پلاوي لومړي مرستیال ښاغلي الحاج خانجان الکوزي د کابل ښاروال، ورسره ټیم او د خصوصي سکتور غړو ته د ښه راغلاست ترڅنګ د کابل ښاروال سره د خصوصي سکتور ستونزې شریکې کړلې. دوی د لاس پلورنکو لپاره د مناسب ځای نشتوالی او په مارکیټونو او سوداګریزو سیمو او د واټونو په غاړه د هغوی ګڼه ګوڼه له ستونزو یاده کړه او د دغې ستونزې د بنسټیز حل غوښتنه یې وکړه.

ښاغلي الکوزي، له قلعه زمان خان څخه تر احمد شاه بابا مینې د سړک، شینې پل او پل پاچا  جوړیدو کې د ساختماني او بنیادي شرکتونو ټکنې کارونه ، د دغه سړک مسیر او د سیمې پر خلکو  اغیزمن وباله او د دغه ستونزې د حل غوښتنه یې وکړه. هغه د ګدامونو اړوند مالونو په وړاندې  د بګرامۍ مارکیټونو سیمې شته ستونزې او همدا راز د کابل څلور دروازو کې د کورنیو محصولاتو آخاذې د خصوصي سکتور له نورو موضوعګانو یادې کړلې چې باید هغه ته لاس رسی او د وضعیت ښه کیدو لپاره کار وشي.

د  اتاق د مدیره پلاوي صنعتي مرستیال ښاغلي الحاج باز محمد افسرزي  او د اتاق د مدیره پلاوي مالي رئیس ښاغلي الحاج غلام نبي عیدي زاده هم د کابل ښار شته ستونزو په ځانګړي ډول د سترو مارکیټونو شاوخوا ته د لوړ پوړیزو ودانیو، څلور لارو، سړکونو او فرعي کوڅو جوړیدو یادونه وکړه.

محترم الحاج اختر محمد ، الحاج نجابت حیدري او د خصوصي سکتور نورو غړو د کابل ښاروالۍ سره د خپلو ستونزو په اړه خبرې وکړې او د کابل له ښاروال یې وغوښتل چې د دوی ستونزې حل کړي.

د کابل ښاروال ښاغلي احمد ذکي سرفراز د اتاق د مشرتابه او خصوصي سکتور له لورې ذکر شوې ستونزې او وړاندیزونه ولیکل او د کابل ښار ماسټر پلان تطبیق برخه کې یې د خپلو پروګرامونو وضاحت ترڅنګ ژمنه کړه چې د اتاق د مشرتابه نږدې همکارۍ سره به مطرح شویو ستونزو ته لاس رسی او حل لار پیدا کوي.