کابل کې د عربستان لوی سفیر ته د اتاق د مشرتابه پلاوي بلنه

د افغانستان د سوداګرۍ او پانګونې خونې مشرتابه پلاوي د شنبې ورځ د 1398 کال د چنګاښ پر 8مه افغانستان کې د سعودي عربستان لوی سفیر جلالتمآب جاسم بن محمد الخالدي او همدا راز په ریاض کې د افغانستان کونسل د مومند ګروپ ساختماني شرکت له یوې رغنیزې پروژې څخه له لیدنې بلنه ورکړه او له دغې پرژې د لیدنې او پروژه کې د جامع جومات پرانستې ترڅنګ  یې د یوې ناستې په ترڅ کې د اقتصادي او سوداګریزو اړیکو د پراختیا په تړاو خبرې وکړې.

دغه ناسته کې چې د مرکز د اتاق د مشرتابه سربیره د کابل، هرات ، کندهار ،ننګرهار او نیمروز ولایتونو د اتاق د مدیره پلاوو غړو ، یو شمېر قومي مشرانو او د خصوصي سکتور غړو حضور درلود ، په پېل کې د افغانستان د سوداګرۍ او پانګونې خونې د مدیره پلاوي سوداګریز مرستیال ښاغلي الحاج محمد یونس مومند د سعودي عربستان لوی سفیر او نورو میلمنو ته  ښه راغلاست وویل او د دواړو اسلامي هېوادونو ترمنځ یې د ورورولۍ د اړیکو پر ټینګښت او همدا راز د سوداګریزو او اقتصادي اړیکو پر پراختیا ټینګار وکړ.

ورپسې د اتاق د مدیره پلاوي لومړي مرستیال ښاغلي الحاج خانجان الکوزي له محترم مومند څخه د دوی له دعوت او د دې ناستې له ترتیب  ، د عربستان د سفیر له تشریف راوړلو او د دغې پروژې له تأسیساتو د لیدنې  مننه وکړه ، له عربستان سره یې د دیني، تاریخي ، دودیزو او سوداګریزو مناسباتو په اړه خبرې کړې.

ښاغلي الکوزي له افغانستان سره په سیاسي، اقتصادي او امنیتي مناسباتو کې د سعودي عربستان د حکومت له لوري په ځانګړي ډول د خادم حرمین شریفین  او د عربستان ولیعهد له مثبتو او جدي تغیراتو یادونه وکړه او د افغانستان د سوداګرۍ او پانګونې خونې سره  یې د هغه هېواد د سفیر له ښې همکارۍ ستاینه وکړه او د اتاق له لوري هم د متقابلې همکارۍ ډاډ ورکړ .

د سعودي عربستان  لوی سفیر جلالتماب جاسم بن محمد الخالدي د ښاغلي مومند له بلنې او میلمه پالنې مننه وکړه او د افغانستان په وړاندې یې د سعودي عربستان له ښو پروګرامونو خبر ورکړ. هغه د افغان سوداګرو لپاره د ویزې ورکړه کې د ښو اسانتیاو یادونه یادونه وکړه و له سوداګرو  یې غوښتنه وکړه چې عربستان هېواد ته سفر وکړي ، ځکه د ښاغلي سفیر په خبره عربستان پام کې لري چې ښې سوداګریزې او اقتصادي برنامې عملي کړي. له دې سره ښاغلي خالدي د افغانستان د سولې له پروسې د عربستان د دولت د ملاتړ یادونه هم وکړه.