کابل کې ( د افغانستان سولې بهیر په تړاو د خصوصي سکتور د خبرو ملي ناسته) ترسره شوه

د افغانستان د سوداګرۍ او صنایعو خونې د افغانستان د سولې بهیر کې د خصوصي سکتور د رسمي دریځ وړاندې کولو په موخه د سولې عالي شورا د دارالانشاء د مشر، د افغانستان د سوداګرۍ او صنایعو خونې او د کابل د اتاق مشرتابه غړو ، د ښځو ، صنایعو او کانونو د خونو رئیسانو، فدراسیونونو ، اتحادیو، د ټولنو مشرانو او له ټول هېواد څخه  د خصوصي سکتور د 300 استازو په ګډون چې له دوی 100 تنه یې د بېلابېلو ولایتونو استازي تشکیلوي د روان کال د ثور پر 3مه نېته د سه شنبې ورځ د کابل انټر کانټیننټال هوټل کې د « افغانستان کې د سولې بهیر په تړاو د خصوصي سکتور د خبرو ناسته » تر سرلیک لاندې ستره غونډه ترسره کړه.

د سوداګرۍ او صنایعو خونې د مدیره پلاوي سوداګریز مرستیال ښاغلي الحاج محمد یونس مومند دغه مهمې ناستې ته د میلمنو راتګ ته ښه راغلاست وویل او خوښي یې وښودله چې خصوصي سکتور دا ډول یوه ستره او مهمه غونډه ترتیب کړې ده. هغه سوله د هر افغان هیله وبلله او خصوصي سکتور یې د سولې سفیر یاد کړ. ښاغلي مومند جګړه  په هېواد کې د بدبختۍ او وورسته پاتې کیدو عامل وګڼله او وده  او پرمختګ یې د تلپاتې سولې پورې تړلي یاد کړل.

د سولې عالي شورا د دارالانشا مشر ښاغلي عمر داوودزي د اتاق او خصوصي سکتور لخوا د دغې سترې غونډې له جوړیدو ستاینه او هرکلی وکړ او د اتاق له مشرتابه یې وغوښتل چې د خبرو د دغې ناستې موندنې د سولې عالي شورا سره شریکې کړي. دوی د سولې او د سولې مشورتي لویې جرګې جوړیدو لپاره د بشپړ چمتووالي په اړه د ټولو خواوو ګډون او د سولې ټینګښت کې د هغې د مثبتې پایلې په اړه مفصلې خبرې وکړې او په افغانستان کې د سولې راتګ لپاره په نړۍواله او سیمه ایزه کچه د شرایطو او ارادې د مساعد کیدو ډاډ ورکړ.

د اتاق د عامل پلاوي مشر ښاغلي عتیق الله نصرت، هېواد کې د سولې راتګ په ځانګړي ډول تلپاتې سوله  د خلکو په سوکالۍ او ژوند او همدا راز د پانګونې او خصوصي سکتور د فعالیتونو برخه کې مهمه وبلله ، زیاته یې کړه : " څرنګه چې د اتاق سروې او څېړنې ښيې ، د خصوصي سکتور د فعالیتونو او د پانګونې د ودې په وړاندې ستره ننګونه د امنیت نشتوالی، سیاسي بې ثباتي او له دغه نا مناسب وضعیت څخه په ګټې اخیستنې،  اخاذې او انسان تښتونې له هغو ستونزو دي چې خصوصي سکتور ورسره مخامخ دی او د هغوی د فعالیتونو لپاره خنډ ګرځي.

ښاغلي نصرت هېواد کې د سولې راتګ کې د  حکومت، سولې عالي شورا او نړۍوالې ټولنې له هڅو د ستایلو ترڅنګ دغه برخه کې د خصوصي سکتور دهیله مندۍ او اندیښنو هم یادونه وکړه.

‏هغه د سولې بهیر کې د خصوصي سکتور مثبت او بې پرې رول ته په پام کې نیولو سره، د یوې کوچنۍ جرګې جوړیدل چې د خصوصي سکتور له ټولو استازو جوړه وي ، د یو چتر لاندې سره راټول او د یو واحد سند تدوین او پراختیا چې د خصوصي سکتور د رسمي دریځ مبین وي مهم یاد کړل. ښاغلی نصرت زیاته کړه، چې دغه سند کې خصوصي سکتور د خپل فعالیت لپاره خپلې اندښنې او پیش شرطونه د سرو کرښو په څېر په نښه کړي او حکومت، د سولې عالي شورا ، نړۍوالې ټولنې او حتی د طالبانو لوري ته رسمآ وړاندې کړي تر څو هغه په جدي بڼه په پام کې ونیسي او هغه د مذاکراتو یوه برخه وګرځوي.

د اتاق عامل مشر تېرو 18 کلونو کې د خصوصي سکتور لاسته راوړنې د پام وړ وبللی او د میلیاردونو ډالرو پانګونې او د  سل ګونه زره کار ځای نومونه یې یاد کړل، چې د بېلګې په  توګه درې برخو ( د بانکدارۍ برخه کې 34 میلیارد افغانۍ پانګونه او متشبثینو ته 42 میلیادرډ افغانۍ پورونه او د مخابراتو برخه کې دوه نیم میلیارډ ډالر پانګونه، د لوړو زده کړو برخه کې 131 خصوصي تحصیلي موسسې چې  183 زره زده کړیالانو ته یې د زده کړو زمینه مساعد کړې ده) یادونه وکړه. هغه، د اوږد مهاله پانګونې، په تشبثاتو کې  د نارینه او ښځینه وو ترمنځ د تبعیض نشتوالي، د کورنۍ او بهرنۍ پانګونو ، د اسلامي او مروجې بانګدارۍ ساتنې تضمین، د سوداګرۍ او پانګې اچونې  لپاره د تشویقي پروګرامونو د دوام تضمین او له ګاونډیانو سره د ښو اړیکو ټینګښت د سولې په خبرو کې د خصوصي سکتور د مخته شرطونو او سرو کرښو په توګه یاد کړل.

په همدې ترتیب د ښځو د سوداګرۍ او صنایعو خونې مشرې آغلې منیژه وافق او د صنایعو او کانونو خونې مشر ښاغلي شېرباز کمین زاده په خپلو وېناو کې د ښځو د فعالیتونو پر دوام او بېلابېلو برخو کې د خصوصي سکتور د رول او مقام په پام کې نیولو ټینکار وکړ.

د دې غونډې دویمه برخه کې د  : ( 1- صنعت او معادن 2- زیربنا او رغنیز 3- خدمات 4- کرنه او سوداګري 5- ښځېنه سوداګرو) سکتورونو کاري ډلې تشکیل شوې او په پای کې یې د افغانستان د سولې پروسې برخه  کې خپل رسمي دریځ او موقف څرګند کړ.

په پای کې د اتاق د مدیره پلاوي لومړي مرستیال ښاغلي الحاج خانجان الکوزي ، د سولې په تړاو نظر څرګندولو کې د خصوصي سکتور د پراخه او فعال ګډون  ستایلو ترڅنګ د کاري ډلو د موندنو له ټولګې خپله ارزونه او ترلاسه شوې پایله وړاندې کړه. په بېلابېلو برخو کې یې د ګروپي کار پایله د رضایت وړ او هر اړخیزه وبلله او د سولې مشورتي لویه جرګه کې د خصوصي سکتور د استازي په توګه له خپل لوري  د لاسته راوړنو د ساتنې، د هېواد جمهور رئیس ، د سولې عالي شورا او حتی مخالفینو ته د خصوصي سکتور د نظرونو رسولو، مخته شرطونو او غوښتنو رسولو برخه کې د خپلو هڅو ډاډ ورکړ. ښاغلي الکوزي د سولې برخه کې د پورته یادو پنځه ګونو ګروپونو اندیښنې، تشویشونه او غوښتنې ورته وګڼلې او د هغې پایله یې په بېلابېلو برخو کې د اوسنیو لاسته راوړنو ساتنه او دوام یاده کړه.